Musharaxa xisbiga saddexaad Muharrem Ince ayaa Khamiistii isaga haray doorashada aadka la isugu dhow yahay ee madaxweynaha Turkey, taasi oo ah tallaabo lama filaan ah oo sare u qaadeysa fursadda ay mucaaradka ku guuelysan karaan wareegga koowaad.
Ince, oo 59 jir ah, ayaa go’aankiisa ku dhowaaqay kadib markii lagu beegsaday olole online-ka ah oo ay ku jireen sawirro la been abuuray oo muujinaya isaga oo la kulmaya haween islamarkaana ku socda gawaari qaali ah.
Musharraxan calmaaniga ah ayaa helay 30.6 boqolkiiba codadka markii uu madaxweyne Erdogan kula loolamay doorashadii 2018.
Waxa uu kadib ka baxay xisbiga weyn ee mucaaradka kadibna billaabay dhaq-dhaqaaq u gaar ah, isaga oo codadka qaar ka qaatay hoggaamiyaha calmaaniyiinta Kemal Kilicdaroglu oo ah midka ugu xooggan ee la loolamaya Erdogan.
“Waxaan ka harayaa musharaxnimadayda,” ayuu Ince u sheegay weriyayaasha kahor doorashada madaxweyne iyo tan baarlamaan ee Axadda. “Tan waxaa u sameynayaa dalkayga.”
Ince ayaa waxa uu weerar xooggan kala kulmay mucaaradka sababo la xiriira inuu ku biiray ololaha doorashada laba bil kahor cod-bixinta.
Dadka dhaliila ayaa u arkay musharax arbushaad wada oo gacan ka gaysan karay in mar kale dib loo doorto madaxweyne Erdogan oo awoodda Turkey haystay tan iyo 2003.
Ince ayaa ku dooday inuu cod-bixiyayaasha siinayey beddel ka wanaagsan Kilicdaroglu oo 74 jir ah, islamarkaana diiwaankiisa doorashooyinka qaran uu aad u liito.
Go’aanka Ince ayaa u muuqday inuu mid lama filaan ah ku noqday madaxweyne Erdogan oo 69 jir ah.
“Mid ka mid ah musharaxiinta ayaa haray. Macquul ma ahan in la fahmo sababta ay tan u dhacday. Dhab ahaantii, aad ayaan u murugsanahay,” ayuu yiri Erdogan oo taageerayaashiisa kula hadlay Ankara.
“Way fiicnaan laheyd inuu sii wado ololihiisa.”
Cod-bixintii ugu dambeysay ee ra’yiga ayaa muujineysa in Kilicdaroglu uu waxyar ka horreeyo Erdogan balse uusan gaarin 50 boqolkiiba, taasi oo ay tahay inuu gaaro si uu u guuleysto wareegga koowaad, oo aan loogu baahan wareeg labaad.
Rajada madaxweyne Erdogan ayaa waxaa caqabad ku noqday xasaradihii dhaqaale ee ugu xumaa ee Turkey asiiba tan iyo sagaashamaadkii iyo dhul-gariirkii ku dhuftay dalkaas bishii Febraayo, oo ay ku dhinteen in ka badan 50,000 oo qof.
Mucaaradka ayaa hadda u mideysan sidii ay uga adkaan lahaayeen Erdogan.
Isbaheysiga ka kooban lixda xisbi ee uu hoggaaminayo Kilicdaroglu ayaa waxaa ka jira dhinacyo kala duwan oo ay ka mid yihiin xubno horey xulufo la ahaa Erdogan.
