Warar dheeraad ah ayaa kasoo baxaya khasaaraha ka dhashay dagaalo culus oo ku dhexmaray deegaanka Ceeldheere Buraale ciidamada dib u xureynta deegaanka oo garab ka helaya ciidanka dowladda Soomaaliya iyo kuwa Al-shabaab.
Dagaalada ka dhacay Ceeldheere Buraale oo ku yaala xaduuda gobolada Hiiraan iyo Shabeellaha dhexe ayaa la sheegay inuu ahaa mid qaatay in ka badan 4 saacadood oo xiriir ah, kaasoo bilaawday kadib markii dagaalamayaal ka tirsan Al-shabaab ay weerar culus ku qaadeen fariisin deegaanadaasi ku lahayeen ciidamada dib u xureynta deegaanka iyo kuwa xoogga dalka Soomaaliyeed.
Guddoomiyaha degmada Maxaas Muumin Maxamed Xalane oo la hadlay Idaacadda VOA-da ayaa sheegay in ciidamada iskaashanaya ay iska caabiyeen weerar kaga ymid Shabaab, islamarkaana dagaalka ay ku dileen 20 ka mid ah dagaalamayaashii Shabaab ee weerarka soo qaaday.
Wuxuu sidoo kale sheegay guddoomiyaha degmada Maxaas oo mudooyinkii dambe ku sugnaa furimaha ay ka socdaan dagaalada ka dhanka ah Shabaab in Maanta ay soo bandhigi doonaan meydadka xubnaha Shabaab looga dilay weerarkii ay shalay ku qaadeen deegaanka Ceeldheere Buraale oo hoostaga degmada Aadan Yabaal ee gobolka Shabeellaha dhexe.
Waa markii labaad oo 24 saac gudahood Al-shabaan weerar ku qaadaan fariisinka ciidamada isgarabsanaya ay ku leeyihiin deegaanka Ceeldheere oo ku yaala xaduuda ay wadaagaan Hiiraan iyo Shabeellaha Dhexe.
